शोध....

चेहरे नुसतेच येथे, रंग साऱ्यांचा निराळा,

पालथे जग घातले, माणूस ना कोठे मिळाला....

वार तो वार होता, छोटा मोठा असे कसाही,
वेदना तितुक्याच झाल्या, भेगाळलेल्या मनाला....

मस्तीत मशगुल सारे, पेटलेली येथे चिता,
कोरड्या भावनेचा, एकही ना अश्रू गळाला.....

वार करुनी पाठीवरी, ते कधी ना आले पुढे,
भ्याड सारे शूर झाले, संघर्ष ना कधी कळाला.....

भाजलेले पाय माझे, श्रावणाच्या या सरीत,
सह्य होता जरा उन्हाळा, तो हि ना मिळाला....

आरश्यात पाहताना , प्रतिबिंब ही दुसरे दिसे,
मी ना मजला मिळालो, शोधूनी साऱ्या तळाला....