शेवट......

केली इथे लोकहो, आज गर्दी हि कशाला?
चाललो आहे आता मी, अनंताच्या दिशेला.......

मिळणार काय आहे, येथे जमून तुम्हा?
दमडी खिशात नाही, प्राशण्याशी विषाला...

यादीत काल तुमच्या, होतो उपेक्षिताच्या,
स्पर्शून पाय माझे, का विटाळता स्वतःला?

जगणे जगून गेलो, मी सर्व एकट्याने,
देवू नका हा खांदा, माझ्या आता शवाला........

सजवू नका फुलांनी निष्प्राण देह माझा,
शेवटी त्या फुलांचे उपकार हो कशाला?

त्या एकटेपणाने, मज सोडले ना कधीही,
त्यालाच देवूद्याहो अग्नी आता चितेला....